رانيا أبو العينين

تفاصيل القصة

اولا اعرفكم القصه باختصار :

أنا كنت(و ما زلت) مدرس في طب المنصورة، دفعة ١٩٩٤. القصه بدايتها لما جيت أمريكا من خمس سنين في منحة لمدة ١٠ شهور من مؤسسة الفولبرايت, و أثناء المنحة كان عندي شغف أني أتعلم اكتر فكان الحل اني اقدم على فيلوشيب, ولكن التحدي اللي كان قدامي عشان انا طبيبه اني لازم احصل علي المعادله قبل ما اقدم علي  فيلوشيب وطبعا كل اللي الناس كانو بيحبطوني بكلام مثلا انه المعادلة دي مستحيلة، و حتى لو عملتيها في تلات سنين مش هاتلاقي نيابة. والتحدي التاني ان سنة تخرجي قديمه. لكن من حسن حظي قابلت دكتور مصري محترم جدا في المكان اللي كانت فيه المنحه ونصحني بحل اسئله وشجعني جدا وبالفعل بدأت في إجازة الكريسماس سنة ٢٠٠٧، امتحنت الجزء الأول ٢٧/٣/٢٠٠٨، و الجزءالتاني في ١٠/٦/٢٠٠٨، و ده كمان في وسط شغل و محاضرات بتبدأ من ٩ أو ١٠ صباحا وحتي ٥ مساء .

و احب اطمنكم، ما عنديش أي قدرات خارقة للعادة، غير أن ربنا كان موفقني و شايف أني باعمل اكتر من اللي اقدر عليه،يعني باختصار اللي قدرت عليه، أي حد ممكن يعمله لو عنده عزيمه و اصرار، و قبل ده كله توفيق ربنا، بس قناعتي (أن الله لا يضيع اجر من أحسن عملا)

ثانيا الخطوات:

1. اولا فيه كتاب أساسي و لا استغناء عنه، و هو المرجع الأساسي اللي أي قراءة كانت منه (First aid for step )
2. ثانيا من خلال القراءة في الكتاب حددت نقاط ضعفي، وبالأخص أني (old graduate) زي ما بيسمونا هنا . كانت النتيجة أني محتاجة اتحسن في الميكروبيولوجي، البيولوجيا الجزيئية، و الباثولوجي. اشتريت كتب الطلبة و كانت سهلة جداً، و بدأت اقرأ فيها.
3. المذاكرة الأساسية  كانت من USMLE Wolrd و ده كان فيه حوالي ٢٠٠٠ سؤال بشرحهم. عملت لنفسي جدول، اول مرة اخلصه كله في ١٨ يوم، و بعدين اعيده كله في أسبوع أو ١٠ أيام، و بعدين أراجع الغلطات المتكررة في بقيت الشهر (لأني اشتريته شهر واحد بس) و بعدين اشتريت كابلان و عملت نفس القصة لمدة شهر.
4. و خلال كل ده كنت بذاكر ال فيرست ايد و تقريبا ذاكرته كله مع الكتب الإضافية اللي كنت باستخدمها علشان افهم اللي كان صعب عليه.
5. أخيرا مما لا شك فيه توفيق ربنا كان من غير حدود، دخلت الامتحان بعد اقل من ٣ شهور و جبت ٩٠٪ وده كان معجزة بكل المقاييس، أنا مش شايفاه مستحيل علي أي حد، لأني مش شايفة نفسي متميزة اوي عن أي حد، أنا بس عندي تصميم، و بحاول لما اعمل حاجة، ابذل قصارى جهدي، (أن الله يحب إذا عمل أحدكم عملا أن يتقنه) وكررت نفس الخطوات في الخطوة الثانيه، و بعدين أسبوع أو أسبوعين عشان CS.
6. قدمت في الماتش في نفس السنه ١/٧/٢٠٠٨،و طبعا ده بقه كله بتاع ربنا، وأكثرت من الدعاء ، و سبحان الله حصلت علي نيابة في التخصص اللي أنا عايزاه.

ممكن في بوست تاني نتكلم عن الفرق بين الطب هنا في أمريكا و في مصر،، و ايه اللي خلاني ماترددش ارجع نائب تاني و كأنك يا بو زيد ما غزيت، كل اللي اقدر أقوله، اللي يقدر يتعلم طب هنا و ما يحاولش ييجي، يبقى غلطان في حق نفسه، و في حق بلده، و في حق دينه