طلاب المعمل الكرام
بما ان المعمل بداء فى مرحلة الجد وتسليم والواجب الاول على الابواب فمهم جدا اننا نتكلم عن ذكر المراجع العلميه او citation
=========
خلينا نتفق ان البحث العلمى قائم بالأساس على التأكد من المعلومة …يعنى مينفعش حد يقول معلومه كده غير موثقة لمجرد انه عارفها …. مفيش حاجه اسمها كده لازم كل حاجه تكتبها تكون بدليل والدليل ده لازم نكون متفقين عليه او يعنى حاجه موثقة أيضا وتم مراجعتها من متخصصين…. ودى تعتبر الخاصيه الاهم فى عمليه البحث العلمى او ما يميزه عن الكفته
.
.
على سبيل المثال: هنتكلم عن مشكلة حوادث الطرق فى مصر كمشكلة بحثية …. مينفعش اقول مثلا “زى ما انتوا شايفين الناس بتموت كل يوم على الطرق” دى كده انا ممكن اقول لك لا على فكره مش كل يوم الناس بتموت على الطرق….. طيب المفروض نقول ايه ؟
المفروض مثلا نقول طبقا للتقرير الصادر عن وزارة الصحة [1] فإن عدد الوفيات فى مصر بسبب حوادث الطرق هو “ونحط رقم”
ونشير بعد كده للرقم [1] ده الى مكان التقرير وكيفية الوصول اليه
..
.
يعنى لازم كل معلومه او حقيقه نذكرها لازم نتاكد من مصدرها ونحطه فى المراجع خصوصا لو كنا بنقولها كحقيقة او معلومه معروفه ….
مفيش حاجه فى البحث العلمى اسمها دى حاجه الناس كلها عرفاها …لازم نشير الى مكان موثق يؤكد الحقيقه دى
طيب ايه هى المصادر الموثقة دى؟
فى مجال البحث العلمى المصادر الموثقة هى الكتب المعتمدة والأبحاث المنشورة فى مجلات علمية معترف بها دوليا وأيضا التقارير الصادرة عن الحكومات والوزارات والهيئات المختلفة.
.
.
طريقة صياغه او كتابه المراجع لها نظام معروف لدى الباحثين وان شاء الله هنتعرض له فى اثناء الكورس بشكل كبير
.
.
هل ده يعتبر plagiarism؟
لا طبعا ذكر المعلومة والمصدر بتعها ده من اساسيات البحث العلمى زى ما قلنا ….
اما ال plagiarism ده هو انك تعمل كوبى وبست من مكان وتنسب الكلام ده لنفسك او تنسب الصياغه لنفسك ….يعنى لو انت بتتكلم عن موضوع ولقيت حد كاتبه بشكل كويس وعجبك وعملت كوبى و بيست لكلامه دى هو ال plagiarism
.
..
وللحديث بقيه
